(تابع) خطاب الرئيس جمال عبدالناصر، بمناسبة عيد العمال في شبرا الخيمة

بريطانيا إيه؟ خطة بريطانيا أن تمكن حكومة الاتحاد من الجنوب المحتل وبعد كده هي بتتمكن من حكومة الاتحاد لأنها هي اللي قايمة. الأمم المتحدة في قرارها قالت إن هذه الحكومة لا تمثل شعب الجنوب. الحكومة الاتحادية لا تمثل شعب الجنوب.

          امبارح قريت إن لندن إذاعة تلغراف باعتاهولي الحكومة الاتحادية ما وصلنيش التلغراف، وصلني عن طريق إذاعة لندن وبيطالبوني إيقاف المعونة لثوار الجنوب. وأنا بدي أقول لهم إن ثوار الجنوب عايزين جنوب مستقل، جنوب متحرر، عايزين يخلصوا من الاستعمار، بيطلعوا يموتوا، انتم عملتم إيه، انتم بتقولوا إنكم عايزين بريطانيا لأحسن عبدالناصر ييجي يستعمرها. عبدالناصر يغزونا. بأقول لكم على الملأ وبأقول للعالم كله إن إحنا مش حانحرك جيشنا إلى الجنوب، أبداً. الجنوب ده لأبنائه وإذا كنتم خايفين من الكلام ده. وطبعاً عارف الكلام ده ملقمه لكم الإنجليز، مزغطنكم الكلام ده، هذا الكلام كلام حجج أنا بأقول للحكومة الاتحادية في الجنوب المحتل اللي راحت لهم الحكومة الإنجليزية وبعثت لهم وزير وقالت لهم إن إحنا عايزين نمشي السنة دي سنة 67 في نوفمبر، قالوا لهم أبداً ما تمشوش خليكم ولا حتى 68 تمشوا. فيه حد يقول للاستعمار اقعد والناس تبص له على إنه إنسان والا تبص له على إنه عميل. أنا بأقول لحكومة الاتحاد اللي بعثت التلغراف امبارح واللي أنا عرفته من إذاعة لندن، بأقول لهم إن تصرفاتهم تصرفات خونة وتصرفات عملاء. قدامكم سبيل واحد لتثبتوا للأمة العربية وللجنوب العربي ولشعب الجنوب المحتل إن كان باقي فيكم شئ من الوطنية أو من الشرف بتعلنوا المطالبة بإنهاء الاستعمار البريطاني في الحال وده، قررته الأمم المتحدة، وتعلنوا إنهاء حالة الطوارئ اللي أعلنت وتطالبوا بيه ده مطلب لشعب الجنوب العربي، وتعلنوا المطالبة بالإفراج عن المساجين السياسيين، ده قرار الأمم المتحدة وده مطلب لشعب الجنوب العربي، وتعلنوا إنكم تبتوا وتستقيلوا.

          اعلنوا التوبة، توبوا قدام الشعب العربي وكل واحد منهم يؤدي استقالته للشعب، للحاكم البريطاني الموجود في عدن. الجماعة اللي بعتوا لي التلغراف امبارح علشان يكفروا عن سيئاتهم عليهم انهم يعجلوا الكلام علشان يثبتوا لشعب الجنوب العربي أو للأمة العربية انهم ناس فاضل فيهم شئ من الشرف وفاضل فيهم شئ من الوطنية. أما إحنا فحانساعد القوى الوطنية في الجنوب المحتل بكل إمكانياتنا وبأقول إن جبهة التحرير كل ما تطلبه مننا لابد أن نلبيه، وفي نفس الوقت بأقول إن كل القوى الوطنية الثورية في الجنوب عليها واجب التلاحم وأن لا تعطي للاستعمار فرصة، الاستعمار النهاردة عايز فرصة ينفذ منها، فيصل قاعد زي الثعبان عايز فرصة يقرص منها. فيصل بيدي تصريح علناً وبقول، يقول إيه؟ من الجنوب العربي، يقول بريطانيا حاتنسحب ليه، بريطانيا يجب أن لا تنسحب من الجنوب، وفيصل بيقول لبريطانيا موتوا الناس واسجنوهم وقطعوا رقابهم واقعدوا في الجنوب، ما تمشوش. فيصل ده عميل للاستعمار وعايز كل الناس تبقى عملاء للاستعمار. مين تاني عايز عدم جلاء الإنجليز من الجنوب، أشكول. أشكول مدي تصريح أول امبارح اللي هو رئيس وزراء إسرائيل، وعايز إنجلترا تقعد في الجنوب وعدن هو وفيصل الاثنين عايزين.

<22>